Zainteresowania
Jednym z moich głównych zainteresowań je tworzyni webów, ale interesujóm mnie aji insze formy spyndzania czasu:)
Do tych, z kierymi se chcym pochfolić, należóm:
Słuchani muzyki
Muzyke móm strasznie rod, choć jako muzyk żech je kompletny antytalent:) Także se ograniczóm do jej słuchanio, lubiym głównie muzyke rockowóm w różnych jej formach — od tych alternatywnych jak np. Radiohead, przez słodki pop rock jaki grajóm Coldplay, wysoko–energetyczny rock w podaniu Disturbed aż po rzaźny metal od Sepultury:) Móm też rod styl, jakim grajóm Massive Attack:)
Co konkretnie w danej chfili posłóchóm zależy przede wszystkim od tego, w jakim żech je humorze. Ale to chyba nikogo nie zaskoczy:)
Jedynóm grupóm, o kierej se pozwolym twierdzić, że na mnie miała wiynkszy wpływ niż kierokolwiek inszo grupa, je Nirvana. Aczkolwiek żech Nirvane zacznół posłóchać aż pore roków po śmierci Kurta Cobaina, tak żech se do ich muzyki zakochoł a pómógła mi przeżyć tyn nejciynżejszy okres puberty...:) Teraz uż se ich puszczóm yny wyjóntkowo, bo muzyke posłóchóm głównie przi pracy a to nima muzyka, przi kierej bych poradzioł robić cosi inszego niż yny posłóchać... Ale czornobioły plakat Kurta mi nad łożkym wisi fórt...:)
Jeżdżyni na kole
Na kole żech kiejsi jeździł strasznie rod, uż na podstawówce żech se pysznił przezwiskym Biker Chester a w nejlepszych rokach żech za rok jeździł koło 3000 km (mój rekord je 3445 km) a rano po drodze do szkoły żech se ścigoł z linkowym autobusym (nigdy nie zapómnym tyn moment, jak żech jedno rano przedjechoł na zastawce w Mostach koło Cz. Cieszyna 3 autobusy naroz, włóncznie z tym "moim":) Teraz uż jeżdzym dość mało, bo dóma żech je małokiedy. Ale fórt je dlo mnie jazda na rowerze jednym z nejprzyjemniejszych a najskuteczniejszych sposobów, jak se odreagować...:)
Fotografowani
Fotografowani móm rod a rod bych se mu poświyncoł wiyncy, ale nie poradzym se na to nónść dość czasu:/ Oprócz tego ostatnim czasym mojóm twórczóm uwage prawie wyłóncznie pochłaniajóm webowe projekty oraz szkoła. Ale jak uż se stanie, że móm czas aji pomysł, tak bierym sfój Canon Powershot IS S2 a wyruszóm w teren. Sfoje zdjyncia nimóm nigdzi na necie jaksi pokupie wystawióne, ale cosi możecie nónść w obrazkach na moim blogu a pore moich zdjynć możecie też obejrzeć w ramach mojej peefki na 2006 rok.
Zbiyrani paczkowanych cukrów
Taki dość przypadkowe hobby, ale za tych pore roków uż móm se mi udało nazbiyrać paczkowane cukry z różnych krajów (m.in. z Honkongu:) Zaczło to tak, że mi dycki było luto niechować cukry w restauracjach, bo herbate pijym niesłodzónóm, tak żech ich po prostu zacznół brać ze sobóm:) Z czasym mi zaczła kolekcja rosnóć, tak że dzisio móm tych cukrów pore set. Za to muszym ale podziynkować aji nikierym znajómym, kierzi se na mnie wspómnieli, jak kaj byli na urlopie a nieposłodzili se zamówiónóm herbate albo kawe a zamiast tego cukier zbalili do kapsy;)