Programy
Troche programować żech zacznół dziepro na gimplu, ale na seminariach informatycznych my nigdy żodyn poważniejszy program nie zrobili a poza seminariami mnie bardziyj interesowało tworzyni strónek internetowych. Także zacznoć programować na poważnie żech był zmuszóny aż na studiach. A to dość wartko:)
Snake
Zapocztowy program na przedmiot Programování. Jeśli chcecie, tak se klidnie możecie zagrać:) A jeśli znocie Pascal, tak se możecie aji kuknyć na kody źródłowe a ewentualnie se program aji uprawić podle siebie;)
Zebra
Zapocztowy program na przedmiot Neprocedurální programování. Je to program, kiery rozwiónzuje zagadki logiczne po czesku nazywane zebry. Je napisany w Prologu, także ku jego spuszczyniu potrzebujecie mieć Prolog nainstalowany (a kapke go znać:) Ale kuknyć se na kody źródłowe a dokumentacje możecie aji w Notepadzie;)
Archie
Zapocztowy program na przedmiot Objektově orientované programování. Program, kiery służy do ułatwiania archiwacji wielkich ilości fotografii poprzez administracje informacji o poszczególnych zdjynciach. Miołech zamiar go wykorzystywać w praktyce, ale działo na konzoli, także do pracy z fotografiami je troche niezrynczny. Planujym ale jego rozszyrzyni (w ramach inszego przedmiotu:) o graficzny interfejs, tak aby z nim szło pieknie pracować pod okiynkami:)
W każdym razie przypadkowym zainteresowanym dowóm do dyspozycji kompletnóm dystrybucje. Zawiyro skompilowany program, kody źródłowe a dokumentacje do użytkowników i do programatorów. Program je napisany w C++ pod Windows (je skompilowany w MS Visual Studio 2005).
Flickr
Flickr je bardzo popularny serwer służóncy do prezentacji fotografii (umożliwio tego ale o dość wiyncyj). Mój zapocztowy program na przedmiot Databázové aplikace mioł na celu wytworzyć schema bazy danych, które by takimu serweru umożliwiało ukłodani i odczytywani fszelkich potrzebnych danych (oczywiście w dość uproszczónej wersji). Jeśli rod pracujesz z databazkami a znosz troche Oracle'a, tak se możesz ścióngnóć kody źródłowe (sóm tam aji jaksi próbne data).
Cheess
Uż żeś se isto fszymnył, że rod dowóm sfoim programóm dziwne miana:) Cheess je programek, kiery umożliwio se zagrać szachy w stylu "Člověče, nezlob se" (tj. z wykopowaniym). Je to mój zapoczciak na Jave a je to mój piyrfszy program z GUI (graficznym interfejsym). Możesz skuknyć zdrojaki albo se ścióngnyć program "skompilowany" jako plik jar (obie wersje zawiyrajóm dokumentacje użytkownika).
PACE - praca licencjacka
Tematym moi pracy licencjacki były "Metody extrakce víceslovných spojení z textu". Víceslovné spojení (czyli zwiónzek frazeologiczny) je takim zwiónzkym słów, kiery po rozdzielyniu na poszczególne słowa traci swoje pierwotne znaczyni — np. biołe wino (mój ulubióny zwiónzek frazeologiczny:)
Praca jako tako je dwuczynściowo: jedna czynść je praktyczno, drugo teoretyczno. Praktyczno czynść polego na napisaniu programu: w moim wypadku to był program, kiery żech roboczo nazwoł PACE a kiery służy do wyszukiwanio zwiónzków frazeologicznych w tzw. Prague Dependency Treebank'u, czyli czeskim korpusie tekstowym z syntaktycznóm anotacjóm. Teoretycznóm czynść tworzy opis zastosowanych metod oraz ich implementacji w ramach programu.
Jeśli chcesz, tak se możesz kuknyć na komplet prace albo yny na prace (czyli tekst:) Kompletno praca zawiyro kody źródłowe, dokumentacje programatorskóm (po angielsku), teoretycznóm czynść (razym z poprawkami), pore różnych skompilowanych wersji programu oraz próbne data.