O mnie
Jeśli cierpisz na alergie z dłógich tekstów, ale i tak byś chcioł o mnie cosi wiedzieć, tak polecóm życiorys — w polski albo czeski wersji.
Imie
Oficjalnie se nazywóm Česlav Przywara (nikogo z Zaolzia isto kómbinacja poczeszczónego imienia a polskigo nazwiska nie zaskoczy...) Rodzice mnie nazwali Czesław, ale w czasach, kiedy żech se urodził, se z urzyndnikami moc nie dało dyskutować, tak móm w papiyrach poczeszczóne miano... Wiynkszość znajomych mi i tak mówi "miyndzynarodowo", czyli Chester. A dobrzi znajómi a ludzie, kierzi po mnie cosi chcóm, mi mówióm Czesio (albo Chesio:)
Narodziny
Urodziłech se w niedziele 11 listopada. Także jeśli chcecie, tak se możecie z pomocóm kalyndzorza zjiścić, w kierym roku to tak isto było. O rok a 3 miesiónce puźni se urodziła moja jedyno siostra a o dalsze 3 miesiónce puźni to buchło w Czernobylu (gdo ani teraz nie wiy, kiedy żech se urodził, niech se po prostu stydzi;)
Podstawówki
Podstawówki żech ukóńczył dwie:) Piyrfsze małoklasówke w Cierlicku, puźni 2. stopiyń w Czeskim Cieszynie. Obe dwie miały sfoje wygody a obie dwie mi na sfój sposób cosi dały. W Cierlicku była tako rodzinno atmosfera a nauczycielki se poświyncały każdymu poszczególnymu uczniowi. Na czeskocieszyński podstawówce ale zaś docenióm to, żech se tam nauczył (prze)żyć w tłumie.
PZKO
Oboje moich rodziców należy do gorliwych działaczy PZKO–wskich, także aji jo żech uż od dziecka spyndzoł dość czasu na różnych imprezach i brygadach a bez jakichkolwiek oporów żech krótko po osiyngniyńciu 15 roku życia do PZKO wstómpił — konkretnie do MK Cierlicko–Kościelec. Zaroz żech zostoł człónkym Zarzóndu naszego Koła i 4 roki (aż do studiów) żech pełnił funkcje protokolanta. Aktualnie z przyczyn technicznych (na zebrania to móm 400km:) uż żech człónkym zarzóndu nima, ale pełniym przynajmniej mniyj czasochłonnóm funkcje członka Komisji Rewizyjnej.
Piyrfszy komputer
W lutym 2000 roku żech "dostoł" sfój piyrfszy komputer. Choć był niby rodzinny, brołch go za sfój, bo żech u niego siedzioł skoro yny jo:) Komputerami żech se interesowoł uż przed tym, ale dziepro od tego momentu żech bardzo intensywnie zacznół rozwijać sfoje zdolności komputerowe.
Gimpel
4 lata na czeskocieszyńskim gimnazjum (czyli poprawnie gimplu:) sóm okresym, kiery cióngle eszcze bierym za nejlepszy w moim życiu. Zero naprawde poważnych starości, imprezkowani z fajnymi ludziami, śfietno partyja w klasie... Miywóm eszcze czasami chfile, w kierych bych se tam nejraczy wrócił...:)
Klub Młodych
W czasie, jak żech był na gimplu my razym z kilkoma kolegami i koleżankami z okolicy Cierlicka i Stanisłowic stwierdzili, że by było fajnie odświeżyć tradycje byłego IKSu, czyli takigo sfoistego Klubu Młodych, kierego człónkami była wiynkszość naszych rodziców. Ponieważ pomysł se spodoboł aji dalszym znajomym z okolicy, tak se my gibko wziyli za realizacje i pod kóniec zimy 2002 roku my mógli ogłosić powstanie nowego Klubu Młodych. Po niecałym roku KM dostoł sfojóm nazwe W Grocie Stankosia a w 2006 roku aji sfoje strónki, także ku moji dotychczasowej funkcji wiceprezesa przibyła aji funkcja webmastera:)
Matfyz
Ostatnim wyraźniejszym okresym moigo życia je tyn aktualny, czyli studia. Studiujym informatyke na matfyzie — aktualnie żech je w piyrfszym roku nawiónzujóncego magisterskigo studia a moim kierunkym je matematyczno lingwistyka.
SAJ
Dziynki tymu, że studiujym troche wolniejszym tempym, móm czas aji na insze rzeczy:) Także od połówki piyrfszoka do poczóntku czfortoka żech był prezesym SAJu Praga a starołch se razym ze skarbnikym oraz referentami (kulturalnym i sportowym:) tutejszych studentów odcióngać od nauki poprzez organizowani różnych imprez:)) Momentalnie se o to fórt eszcze staróm, ale uż yny we funkcji webmastera. Z funkcji prezesa SAJu Praga żech zrezygnowoł po objynciu (bardzo poważnej:)) funkcji prezesa SAJu.
Poza tym
A jeśli mi zustanie jaksi wolny czas, tak tworzym albo se poświyncóm sfoim inszym zainteresowanióm (czasami oboje naroz:)